ஆசிய கோப்பை கிரிக்கெட்: இலங்கை மீண்டும் சாம்பியன்
ஆசிய கோப்பை கிரிக்கெட்: இலங்கை மீண்டும் `சாம்பியன்’
இந்திய கனவை தகர்த்தார், மென்டிஸ்
ஆசிய கோப்பை கிரிக்கெட்டில் இலங்கை அணி மீண்டும் சாம்பியன் பட்டத்தை தக்க வைத்துக் கொண்டது. சுழற்பந்து வீச்சாளர் மென்டிஸ், இந்தியாவின் கனவை சிதறடித்தார்.
இறுதிப்போட்டி
6 நாடுகள் பங்கேற்ற 9-வது ஆசிய கோப்பை கிரிக்கெட் போட்டி பாகிஸ்தானில் நடந்தது. இதில் கராச்சியில் நேற்று நடந்த இறுதிப்போட்டியில் இந்தியா-இலங்கை அணிகள் மோதின. இந்திய அணியில் ஒரே ஒரு மாற்றமாக பிரவின்குமாருக்கு பதிலாக உத்தப்பா சேர்க்கப்பட்டார். இலங்கை அணியில் முந்தைய ஆட்டத்தில் ஓய்வு அளிக்கப்பட்டிருந்த சமிந்தா வாஸ், அஜந்தா மென்டிஸ் மீண்டும் திரும்பினர்.
டாஸ் வென்ற இந்திய கேப்டன் டோனி முதலில் இலங்கையை பேட் செய்ய பணித்தார். இதையடுத்து ஜெயசூர்யாவும், சங்கக்கராவும் இலங்கை அணியின் இன்னிங்சை தொடங்கினார்கள். 2-வது ஓவரில் இலங்கை அணிக்கு அதிர்ச்சி ஆரம்பமானது. சங்கக்கரா (4 ரன்) ரெய்னாவால் ரன்-அவுட் செய்யப்பட்டார். இதன் பிறகு ஒரு பக்கம் ஜெயசூர்யா சரவெடியாய் வெடித்துக் கொண்டிருக்க, மறுபுறம் விக்கெட்டுகள் சரிந்தன. கேப்டன் ஜெயவர்த்தனே 11 ரன்னிலும் (19 பந்து, ஒரு பவுண்டரி), கபுகேதரா 5 ரன்னிலும் (11 பந்து), சமர சில்வா ரன் ஏதுமின்றியும் (0), இஷாந்த் ஷர்மா பந்து வீச்சுக்கு இரையானார்கள். 12-வது ஓவரில் 66 ரன்னுக்குள் 4 விக்கெட்டுகளை இழந்து இலங்கை அணி தத்தளித்தது.
ஜெயசூர்யா சதம்
இந்த சூழலில் ஜெயசூர்யாவுடன், தில்ஷன் ஜோடி சேர்ந்தார். விக்கெட் சரிவை பற்றி துளியும் கவலைப்படாமல் ஜெயசூர்யா தனது வழக்கமான பாணியில் வெளுத்து வாங்கினார். அவர் 56 ரன்களில் இருந்த போது மிட்-ஆன் திசையில் நின்ற ஆர்.பி.சிங் கடினமான ஒரு கேட்ச்சை கோட்டை விட்டார். அதன் பலனை ஆர்.பி.சிங் உடனே அனுபவிக்க நேர்ந்தது. அவர் வீசிய ஒரு ஓவரில் 3 சிக்சரும், 2 பவுண்டரியும் ஜெயசூர்யா விளாசி, திகைக்க வைத்தார். ஜெயசூர்யா அதிரடியால், இலங்கை அணியின் ரன்-ரேட் 6 ரன்களுக்கு மேலாகவே சென்று கொண்டிருந்தது. ஸ்கோர் 300 ரன்களை தாண்டலாம் என்ற எதிர்பார்ப்பு நிலவியது. அபாரமாக ஆடிய ஜெயசூர்யா 79 பந்துகளில் தனது 27-வது சதத்தை தொட்டார். இந்தியாவுக்கு எதிராக அவர் கண்ட 6-வது சதமாகும்.
சதத்திற்கு பிறகு ஜெயசூர்யா மிகவும் களைத்து போனார். தவிர, ஓஜாவும், ஷேவாக்கும் சுழற்பந்து வீச்சில் அவர்களுக்கு கடும் நெருக்கடி கொடுத்தனர். இதனால் மிடில் பகுதியில் ரன் வேகம் வெகுவாக குறைந்தது. ஜெயசூர்யாவும், தில்ஷனும் ஒன்று, இரண்டு ரன்கள் வீதமே எடுத்தனர்.
ஸ்கோர் 197 ரன்களாக உயர்ந்த போது, முக்கியமான கட்டத்தில் இந்த ஜோடி பிரிந்தது. ஜெயசூர்யா 125 ரன்களில் (114 பந்து) குவித்த நிலையில், ஷேவாக் பந்து வீச்சில் இஷாந்த் ஷர்மாவிடம் கேட்ச் ஆனார். அவரது ரன்னில் 9 பவுண்டரியும், 5 சிக்சரும் அடங்கும். அணியை சரிவில் இருந்து மீட்ட இந்த இணை 5-வது விக்கெட்டுக்கு 131 ரன்கள் சேர்த்தது சிறப்பம்சமாகும். சிறிது நேரத்தில் தில்ஷனும் (56 ரன், 74 பந்து, 3 பவுண்டரி) ஆட்டம் இழந்தார்.
273 ரன்கள் சேர்ப்பு
இதன் பிறகு ஆட்டம் இந்தியாவின் கட்டுக்குள் வந்தது. 20-40-வது ஓவர் வரை ஒரு பவுண்டரி கூட அடிக்கப்படவில்லை. இறுதி கட்டத்தில் வாஸ் (19 ரன்), குலசேகரா (29 ரன், 29 பந்து, 3 பவுண்டரி) ஆட்டம் மட்டும் குறிப்பிடும்படி இருந்தது. முடிவில் இலங்கை அணி 49.5 ஓவர்களில் 273 ரன்களுக்கு ஆல்-அவுட் ஆனது.
இந்திய தரப்பில் ஆர்.பி.சிங், இஷாந்த் ஷர்மா தலா 3 விக்கெட்டுகளும், இர்பான் பதான் 2 விக்கெட்டுகளும், ஷேவாக் ஒரு விக்கெட்டும் கைப்பற்றினார்கள்.
ஷேவாக் அரை சதம்
அடுத்து 274 ரன்கள் எடுத்தால் ஆசிய கோப்பை என்ற இலக்கை நோக்கி இந்திய அணி ஆடியது. தொடக்க ஆட்டக்காரராக இறங்கிய ஷேவாக், பந்துகளை தொடர்ச்சியாக பவுண்டரிக்கு ஓட விட்டு மிரட்டினார். மற்றொரு தொடக்க ஆட்டக்காரர் கம்பீர் 6 ரன்களில் ஏமாற்றி நிலையில், அடுத்து சுரேஷ் ரெய்னா ஆட வந்தார். மின்னல் வேகத்தில் ஆடிய ஷேவாக் 26 பந்துகளில் அரைசதத்தை கடந்தார். இதன் மூலம் ஆசிய கிரிக்கெட்டில் குறைந்த பந்தில் அரை சதம் அடித்தவர் என்ற சிறப்பை அவர் பெற்றார்.
ஆனால், இலங்கை சுழற்பந்து வீச்சாளர் மென்டிஸ் பந்து வீச தொடங்கியதும் ஆட்டத்தின் போக்கு மாறியது. அவரது பந்தில் ஷேவாக் (60 ரன், 36 பந்து, 12 பவுண்டரி), ஸ்டம்பிங் ஆனார். அடுத்து வந்த யுவராஜ்சிங் (0) அதே ஓவரில் போல்டு ஆக இந்தியா அதிர்ந்தது. இதன் பிறகு ரெய்னா (16 ரன்), ரோகித்ஷர்மா (3 ரன்) ஆகியோரையும் மென்டிஸ் காலி செய்ய இந்தியா பெரும் சரிவுக்குள்ளானது. கேப்டன் டோனி-உத்தப்பா ஜோடி 6-வது விக்கெட்டுக்கு சிறிது நேரம் போராடினாலும், இந்தியாவை அவர்களால் நிமித்த முடியவில்லை. உத்தப்பா 20 ரன்களில் (41 பந்து) எல்.பி.டபிள்ï. ஆனார்.
இலங்கை சாம்பியன்
அடுத்து மீண்டும் பந்து வீச வந்த மென்டிஸ் மேலும் 2 விக்கெட்டுகளை சரித்து இந்தியாவை முழுமையாக தோல்வி பாதைக்கு தள்ளினார். கடைசி வரை போராடிய டோனி 49 ரன்களில் (74 பந்து, 4 பவுண்டரி) வெளியேற இந்திய அணி 39.3 ஓவர்களில் 173 ரன்களுக்கு ஆல்-அவுட் ஆனது.
இதனால் 100 ரன்கள் வித்தியாசத்தில் இலங்கை அணி மீண்டும் சாம்பியன் பட்டத்தை தக்க வைத்துக்கொண்டது.
இலங்கை தரப்பில் மென்டிஸ் 13 ரன்கள் விட்டு கொடுத்து 6 விக்கெட்டுகளை அள்ளினார். ஆசிய கிரிக்கெட் வரலாற்றில் ஓர் வீரர் 6 விக்கெட்டுகள் வீழ்த்துவது இதுவே முதல் முறையாகும். 23 வயதான மென்டிஸ் இதுவரை 8 ஒரு நாள் போட்டிகளில் தான் ஆடியிருக்கிறார். அவர் தான் எங்களுக்கு துருப்பு சீட்டாக இருப்பார் என்று இலங்கை கேப்டன் ஜெயவர்த்தனே சொல்லியிருந்தார். அதனை அவர் நிரூபித்தும் காட்டி விட்டார். லீக்கில் அடைந்த தோல்விக்கும் இந்தியாவை பழிதீர்த்து கொண்டனர். முன்னதாக இலங்கை அணி 1986, 1997, 2004 ஆண்டுகளில் சாம்பியன் பட்டத்தை வென்றிருந்தது குறிப்பிடத்தக்கது.
மென்டிஸ் ஆட்ட நாயகன், தொடர் நாயகன் ஆகிய இரண்டு விருதுகளையும் தட்டிச் சென்றார். அவர் தொடரில் மொத்தம் 17 விக்கெட்டுகளை கைப்பற்றினார்.
இந்தியா பரிதாபம்
இந்தியா ஏற்கனவே 4 முறை ஆசிய கோப்பையை வென்றிருந்தாலும், 1995-ம் ஆண்டுக்கு பிறகு ஆசிய கோப்பையை முகர்ந்ததில்லை. மேலும் கடந்த 10 ஆண்டுகளாக இலங்கைக்கு எதிராக மோதிய இறுதிப்போட்டிகளில் வெற்றி பெற்றதில்லை. அந்த சோகம் இன்னும் தொடர்ந்து கொண்டு இருக்கிறது. கடந்த 2004-ம் ஆண்டு ஆசிய இறுதிப்போட்டியிலும் இந்திய அணி, இலங்கையிடம் தான் தோற்றது குறிப்பிடத்தக்கது.
ஸ்கோர் போர்டு
இலங்கை
ஜெயசூர்யா (சி) இஷாந்த் (பி) ஷேவாக் 125
சங்கக்கரா (ரன்-அவுட்) 4
ஜெயவர்த்தனே (சி) ரோகித் (பி) இஷாந்த் 11
கபுகேதரா (சி) ரெய்னா (பி) இஷாந்த் 5
சமர சில்வா (பி) இஷாந்த் 0
தில்ஷன் (சி) டோனி (பி) இர்பான் பதான் 56
வாஸ் (பி) ஆர்.பி.சிங் 19
குலசேகரா (நாட்-அவுட்) 29
துஷாரா எல்.பி.டபிள்ï. (பி) ஆர்.பி.சிங் 5
மென்டிஸ் (பி) ஆர்.பி.சிங் 8
முரளிதரன் (சி) டோனி (பி) இர்பான் பதான் 2
எக்ஸ்டிரா 9
மொத்தம் (49.5 ஓவர்களில் ஆல்-அவுட்) 273
விக்கெட் வீழ்ச்சி: 1-11, 2-34, 3-66, 4-66, 5-197, 6-213, 7-236, 8-256, 9-264
பந்து வீச்சு விவரம்
ஆர்.பி.சிங் 9-1-67-3
இஷாந்த் ஷர்மா 10-1-52-3
இர்பான் பதான் 9.5-0-67-2
ஓஜா 10-1-38-0
ஷேவாக் 8-0-30-1
ரோகித் ஷர்மா 3-0-11-0
இந்தியா
கம்பீர் (சி) தில்ஷன் (பி) வாஸ் 6
ஷேவாக் (ஸ்டம்பிங்) சங்கக்கரா (பி) மென்டிஸ் 60
ரெய்னா (பி) மென்டிஸ் 16
யுவராஜ்சிங் (பி) மென்டிஸ் 0
டோனி (சி) சங்கக்கரா (பி) வாஸ் 49
ரோகித் ஷர்மா எல்.பி.டபிள்ï (பி) மென்டிஸ் 3
உத்தப்பா எல்.பி.டபிள்ï (பி) முரளிதரன் 20
இர்பான் பதான் (சி) ஜெயவர்த்தனே (பி) மென்டிஸ் 2
ஆர்.பி.சிங் (பி) மென்டிஸ் 0
ஓஜா (நாட்-அவுட்) 6
இஷாந்த் ஷர்மா (பி) குலசேகரா 8
எக்ஸ்டிரா 3
மொத்தம் (39.3 ஓவர்களில் ஆல்-அவுட்) 173
விக்கெட் வீழ்ச்சி: 1-36, 2-76, 3-76, 4-93, 5-97, 6-135, 7-154, 8-154, 9-160
பந்து வீச்சு விவரம்
வாஸ் 9-0-55-2
குலசேகரா 6.3-0-26-1
துஷாரா 8-0-51-0
மென்டிஸ் 8-1-13-6
முரளிதரன் 8-0-26-1
குறிச்சொற்கள்: ஆசியா, இந்தியா, இலங்கை, கனவு, கோப்பைஇந்தக் குறிச்சொற்களுடன் ஒத்திருக்கும் இடுகைகள்
Print This Post
Ping: தமிழ்மணம், தேன்கூடு
இந்த செய்தி குறித்த பிறரின் கருத்துக்களைத் தொடர்ந்து அறிய RSS 2.0 ஒடையைப் பெற்றுக் கொள்ளுங்கள். இச்செய்தி குறித்த உங்கள் கருத்தைத் தெரிவிக்கலாம். அல்லது, இது குறித்து உங்கள் தளத்தில் எழுதலாம்.
உங்கள் கருத்தைத் தெரிவிக்கவும்